Taazeez ehtemam.e.chaman kon de gaya?
mujh ko gulab jesa kafan kon de gaya?
dekhe jo khadokhal tu socha hai baarha
sehra ki chandni ko badan kon de gaya?
meri jabeen ki saari lakeeren teri ata
lekin teri qba ko shikan kon de gaya?
tere hunar mai khalqat.e.khushbu sahi magar
kanton ko umer bhar ki chubhan kon de gaya?
jungle se pouchti hai hawaon ki barhami
jugnu ko tergii mai kiran kon de gaya?
kisne basai aankh mai ashkon ke qaflay
be.ghar musafiron ko watan kon de gaya?
tujhse tu har pal ki musafat ka sath tha
mere badan ko itni thakan kon de gaya?
tora hai kisne nok.e.sunaan per sakoot.e.sabar
lab bastagii ko taab.e.sakhan kon de gaya?
mohsin wo kainaat.e.ghazal hai usay bhi dekh
mujhse na pouch mujh ko ye kafan kon de gaya?
No comments:
Post a Comment