Mujhe Ijazat De, Main Apne Honton Ki Be-Rang Roshni Se, Tere Labon Pe Mohabbat Ka Lafz Likhon Ga, Urdu Image Poetry, Ghazal collection

Mujhe Ijazat De

Main Apne Honton Ki Be-Rang Roshni Se,

Tere Labon Pe Mohabbat Ka Lafz Likhon Ga, 

Mujhe Ijazat De

Parrhi Hai Main Ne Tere Chashm-e-Nam Ki Tehreeren,

Tere Khamosh Labon Se Suni Hai Taqreeren,

Main Chaahta Hoon Mere Piyaar Ki Hararat Se,

Pighal k Mom Bane Tere Gham Ki Tehreeren,

Main Chaahta Hoon Ki Apni Nazar Mein Qaid Karon,

Tere Haseen Tabassum Ki Shaukh Tasveeren,

Main Chaahta Hoon K Meri Nazar K Boson Ki,

Gawahiyaan Tere Rukhsar-o-Lab Se Milne Lage,

Main Chaahta Hoon Ki Jab Main Teri Taraf Dekhoon,

To Mere Dil Me Shagufta Gulaab khilne Lage,

Hon Laakh Zehan Ka Aazaad Kiya Hai Mere Paas,

Siwaye Ek Dil-e-Barbaad, Kiya Hai Mere Paas,

Tujhe Sunaane Ko Rudaad Kiya Hai Mere Paas,

K Tujh Se ISHQ ki Buniyaad Kiya Hai Mere Paas,

K Mere Saath Koi Hum Mizaaj Bhi To Nahi,

K Dastaras Mein Meri Mera Aaj Bhi To Nahi,

K Mere Qabze Mein Mera Samaaj Bhi To Nahi,

K Mere Paas Koi Takht-o-Taj Bhi To Nahi,

Main Tujh Ko Maang Loon Aisa Riwaaj Bhi To Nahi,

Gila Nahi Hai Mohabbat Ki Na Rasaai Se,

Tujhe Bachaaon Ga Ilzaam-e-Be-Hayaai Se,

Main Larr Na Paaon Ga Itni Barri Khudai Se,

Main Tujh Ko Chaahon Ga Jazbon Ki Parsaai Se,

Main Apne Honton Ki Be-Rang Roshnaai Se,

Tere Labon Pe Mohabbat Ka Lafz Likhoon Ga,

Mujhe Ijazat De